KÜSMƏRƏM

Mən şirin nəğməli bir bülbüləm ki,
Güllərdən küsərəm, səndən küsmərəm!
Məni öz canından artıq istəyən
Ellərdən küsərəm, səndən küsmərəm!

Gözlərin misaldır axan çaylardan,
Kipriyin oxlardan, qaşın yaylardan.
Qarşımıza gələn uzun aylardan,
İllərdən küsərəm, səndən küsmərəm!

El içində bizə derlər Sayadlı,
Tərlan ovçusuyam, ruhum qanadlı.
İlham pərisinin açdığı dadlı
Dillərdən küsərəm, səndən küsmərəm!

Mikayıl Müşfiq



MƏHƏBBƏT

Mən ki, bilməz idim nədir məhəbbət,
Bu sirri sən mənə anlatmadınmı?
Dünyaya sığmayan şair könlümü
Köksündən çıxarıb oynatmadınmı?

Mən ki, nəğmə deyib bənövşələrdən,
Peşəm zövq almaqdı bir şux dilbərdən.
Məndən uzaq gəzib dolanıb hərdən
Qəlbimi sıxmağa can atmadınmı?

Min hicran könlümü alanda ələ,
Zərrəcə halıma yanmadın belə,
Müşfiqin qəlbini tez alıb ələ
Onu röyalardan oyatmadınmı?
Mikayıl Müşfiq